Саламаттык сактоо министрлигинин маалыматы боюнча, социалдык тармактарда жүзүндө тубаса кемтиги бар ымыркайдын видеосу тарап, анда каржылык жардам көрсөтүүгө чакырыктар камтылган. Министрлик билдиргендей, баланын ким экендиги, оорусу жана каражат чогултуунун мыйзамдуулугу тууралуу маалыматтар расмий түрдө тастыкталган эмес.
«Жарандарды көрсөтүлгөн банктык реквизиттерге акча которуудан жана текшерилбеген маалыматтарды таратуудан карманууга чакырабыз», — деп айтылат министрликтин билдирүүсүндө.
Министрлик кайрымдуулук жардамын көрсөтүүдөн мурда мындай кайрылуулардын аныктыгын кылдат текшерүү керектигин белгиледи. Ошондой эле жарандарды сак болууга жана боорукерлигин алдамчылык максатында пайдаланууга жол бербөөгө үндөдү.
Министрлик коомчулукту расмий маалымат булактарына гана ишенүүгө жана шектүү кайрылууларды таратпоого чакырды.
