Россия президентинин басма сөз катчысы Дмитрий Песков Казакстан президенти Касым-Жомарт Токаевдин «стамбулдук келишимдерге» кайтуу жана Украинадагы жаңжалды тоңдуруу сунушуна жооп берди. Песковдун билдирүүсүнө ылайык, Киевдин позициясын эске алганда бул чыр-чатакты «тоңдуруу» мүмкүн эмес.
Буга чейин Владимир Путин менен болгон жолугушууда Казакстан президенти Украинадагы жаңжалды тоңдуруп, «стамбулдук формулага» кайтуу керектигин айткан. Токаев ошондой эле бул чыр-чатакта ортомчу болууну каалабай турганын кошумчалаган.
Песковдун сөзүнө караганда, Россия үчүн өз максаттарына жетүү артыкчылыктуу бойдон калууда. «Алар түшүнүктүү, ырааттуу. Ошондуктан, эгер киевдик режим тиешелүү чечимдерди кабыл алса, мунун баары бүгүн күндүн аягына чейин токтошу мүмкүн», — деди басма сөз катчы. Ал ошондой эле Путин Токаевдин сунушуна жооп катары ага атайын аскердик операциянын жүрүшү тууралуу кененирээк айтып бергенин билдирди.
Кремлдин маалыматына ылайык, Казакстан президенти Касым-Жомарт Токаевдин Украина боюнча позициясы ырааттуу, бирок бул Кремл ага кошулат дегенди билдирбейт.
