Кемин районуна караштуу Орловка шаарында бүгүн, 28-октябрда, жылытуу мезгили старт алды. Бул тууралуу муниципалдык жылуулук менен камсыздоо ишканасы билдирди.
Ишкананын маалыматы боюнча, учурда казананын жана суу ысытуучу жайлардын жабдууларын даярдоо иштери жүрүп жатат. Ошондой эле жылуулук тармактарындагы аныкталган агып кетүүлөр ыкчам жоюлууда. Мазут казанага өз убагында жана үзгүлтүксүз жеткирилип турат.
Бирок жылуулук дароо эле келбейт. Администрация казананы ишке киргизүү татаал, көп этаптуу процесс экенин эскертет. Эң маанилүү этаптардын бири — сактоо резервуарларындагы мазутту ысытуу.
Мазут эмне үчүн 100 градуска чейин ысытылат?
Мазутту мешке берүүдөн мурун, аны жок дегенде 100 градус Цельсийге чейин ысытуу керек. Бул бир нече себептен улам зарыл:
- Агуу жакшыртылат: ысытылган мазут магистралдык түтүктөр аркылуу мешке оңой өтөт.
- Мешке берүү: мазут күйүү камерасына атайын форсункалар аркылуу берилет, бул үчүн анын суюк консистенциясы өтө маанилүү.
- Күйүү натыйжалуулугу жогорулайт: ысытылган мазут ашыкча көө жаратпай, ашыкча чыгымды алдын алып, натыйжалуу күйөт.
Ошондуктан казана ишке киргизилгенден кийин эле үйлөргө жылуулук дароо кирбейт. Мындан тышкары, Орловка шаары боюнча жылуулук тармактарын жылытуу жана жылуулукту борбордук магистралдар аркылуу казанадан турак жайларга жеткирүү үчүн да убакыт талап кылынат.
Кандай болбосун, жылытуу мезгили жакында башталат. Тургундардан жылуулук берилүүгө даяр болууну жана ал келгенде радиаторлордон абаны чыгарууну суранабыз.
Ишкана тургундарды чыдамкайлыкка чакырып, жылуулук этап-этабы менен берилерин белгилейт.
