Мамлекеттик салык кызматы Кыргызстанда тигүү тармагынын жана маркетплейстерде иштеген ишкерлердин бирдиктүү салыгын нөлгө түшүрүүнү каалайт. Бул сунуш 1-августтан баштап күчүнө кириши мүмкүн.
Мындай чара Кыргызстандын салык кызматы тарабынан Орусиядагы Wildberries кампаларына болгон кол салуулардан жабыркаган ишкерлерди колдоо максатында демилгеленүүдө. Учурда тигүү тармагындагы ишканалар кирешесинин 0.25% өлчөмүндө бирдиктүү салык төлөшөт. МСК бул ставканы жылдын аягына чейин нөлгө түшүрүүнү сунуштап жатат.
Ошондой эле, эл аралык маркетплейстерде, анын ичинде эл аралык платформаларда соода кылган ишкердик субъекттери үчүн 2% өлчөмүндөгү бирдиктүү салыкты да жылдын аягына чейин нөлгө түшүрүү каралууда.
Кубанычбек Ысабековдун айтымында, бул демилге Кыргызстандын бизнесинин атаандаштыкка жөндөмдүүлүгүн жогорулатууга багытталган. Дүйнөдө жана аймакта түзүлгөн кырдаалда ата мекендик бизнести колдоо зарылдыгы менен байланыштуу.
МСКнын маалыматы боюнча, учурда 30 миңге жакын ишкердик субъекттери маркетплейстер аркылуу иштешет жана алардын саны жыл сайын өсүүдө. Ысабеков белгилегендей, башка өлкөлөрдүн ишкерлери Кыргызстанга келип, бул жерде жеке ишкер ачып, эл аралык маркетплейстерде соода кылып, Кыргыз Республикасынын бюджетине 2% төлөшөт. Ошондуктан, ставканы нөлгө түшүрүү ата мекендик ишкерлерди колдоого алып, өнүгүүгө түрткү болот деп эсептелет.
МСК жылдын аягына чейин кырдаалды баалоону, андан кийин өлкө жетекчилигине жана Министрлер Кабинетине мындан аркы сунуштарды даярдоону көздөп жатат. Ошондой эле, 2026-жылдын аягына чейин тигүү тармагы жана маркетплейстердеги сатуучулар үчүн бирдиктүү салык ставкасын нөлгө түшүрүү сунушталууда.
