Манас шаардык кеңеши өткөрүлгөн XXXI сессиясында шаардын 2026-жылга карата жергиликтүү бюджетине өзгөртүүлөрдү киргизүү жөнүндө чечим кабыл алды. Бул токтом шаар мэриясынын кайрылуусу боюнча Кыргыз Республикасынын Бюджеттик кодексинин 115-беренесине ылайык кабыл алынды.

Такталган планга ылайык, бюджеттин киреше бөлүгү негизинен капиталдык жардам жана жеке жактардан алынуучу киреше салыгынын кошумча түшүүлөрү эсебинен көбөйтүлдү. Киреше салыгы шаардын өзүнүн негизги киреше булагы болуп кала берет.

Кошумча түшкөн каражаттар шаардын муктаждыктарына кайра бөлүштүрүлөт. Жаңы чыгымдардын эң чоң бөлүгү Гүлүстан айылында 100 орундуу бала бакча курууга багытталган.

Бюджеттин негизги багыттары

100орундуу бала бакча
600 млнсомго жакын кошумча каражат

Мындан тышкары, каражаттар жер ресурстары башкармалыгы боюнча жарандарга мүлк (жер жана имараттар) үчүн компенсация төлөөгө, мэрия менен шаардык кеңеш үчүн кызматтык унааларды сатып алууга, ошондой эле билим берүү жана спорт мекемелеринин айрым чыгымдарына жумшалат.

Атап айтканда, Р. Санатбаев атындагы №9 мектепке мурда чатырды алмаштырууга каралган каражаттар жаңы казан орнотууга которулду.

Токтомдун аткарылышын шаардык кеңештин бюджет, экономика, финансы жана салыктар боюнча туруктуу комиссиясы көзөмөлгө алат. Документ шаардык кеңештин сайтында расмий жарыяланган күндөн тартып күчүнө кирет.