Кыргызстанда орточо аба температурасы акыркы 50 жыл ичинде болжол менен 1,3 градуска жогорулаган. Салыштырып айтканда, бул мезгилде дүйнөлүк өсүш болжол менен 1 градусту түзгөн. Бул тууралуу климатолог Зоя Кретова "Жашыл чай" подкастында билдирди.
Анын айтымында, Кыргызстан орточо дүйнөлүк деңгээлден тезирээк жылууда, бирок Борбордук Азияда жылуулуктун темпи боюнча лидер эмес. Түркмөнстан, Өзбекстан жана Казакстанда, айрыкча токойлору, тоолору жана мөңгүлөрү аз түздүк аймактарда температура тезирээк өсүп жатат.
Ошол эле учурда климаттын өзгөрүшү бир калыпта эмес. Кыргызстандын айрым аймактарында жай айларында температура төмөндөп, ал эми ноябрь жана декабрь айлары көп жылдык кесилиште суук болуп баратат. Ошондуктан адистер глобалдык жылуулук жөнүндө гана эмес, климаттын өзгөрүшү жөнүндө сөз кылууну артык көрүшөт.
Зоя Кретова жакынкы жылдарда бул тенденция сактала берерин эскертет.
