Климатолог Зоя Кретованын айтымында, Кыргызстан жети жылдан бери жаан-чачындын жетишсиздиги менен жабыркап келет. Ал жаан-чачындын көлөмү же нормадан төмөн, же норманын чегинде болуп жатканын белгиледи. Бул тууралуу ал «Жашыл чай» подкастында айткан.
Кретованын айтымында, көйгөй жалаң гана жамгырга тиешелүү эмес. Көптөгөн дарыяларды жазында суу менен камсыз кылган мезгилдүү кардын көлөмү да азайып жатат. Эксперт Кыргызстандагы суу агымы мөңгүлөрдөн гана эмес, кар жабуусунан, жамгырдан жана жер астындагы суулардан да түзүлөрүн баса белгиледи.
Суунун жетишсиздигинин олуттуу кесепеттеринин бири — Токтогул суу сактагычынын керектүү көлөмүн топтоодогу кыйынчылыктар.
Өлкө боюнча өзгөрүүлөр бир калыпта эмес. Салттуу түрдө жаан-чачын көп түшкөн аймактарда алардын интенсивдүүлүгү жогорулашы мүмкүн. Ал эми климаты кургакчыл жерлерде нымдуулук азайып, климаттык айырмачылыктар күчөп жатат.
Климатолог Суусамыр өрөөнүнө өзгөчө көңүл бурду. Анын айтымында, ал жерде вегетация мезгилинде, башкача айтканда, өсүмдүктөргө ным өзгөчө керек болгон учурда жаан-чачын кыскарып жатат.
