Кыргызстанда өзгөчө кырдаалдар учурунда калкка маалымат берүүнү бир калыпта иштетүү үчүн ыкчам медиаштаб түзүү идеясы айтылууда. Бул долбоор Министрлер Кабинетинин токтому катары коомдук талкууга чыгарылды.

Документти Маданият, маалымат жана жаштар саясаты министрлиги иштеп чыккан. Долбоорго ылайык, медиаштаб өзгөчө кырдаал келип чыкканда же анын коркунучу жаралганда түзүлөт. Аны чакыруу жөнүндө чечим Президенттин администрациясынын маалыматтык саясат кызматы менен макулдашуу боюнча Маданият министрлиги тарабынан кабыл алынат.

Түзүмдүн курамы жана милдеттери

Медиаштабдын курамына Маданият министрлигинин, Президент администрациясынын, Өзгөчө кырдаалдар министрлигинин (ӨКМ) жана башка тиешелүү мамлекеттик органдардын, ошондой эле алардын басма сөз кызматтарынын өкүлдөрү киришет. Керек болгон учурда жумушка журналисттерди, эксперттерди, санариптик коммуникациялар боюнча адистерди, коомдук уюмдардын өкүлдөрүн жана блогерлерди тартууга мүмкүнчүлүк берилет.

Жаңы түзүмдүн башкы милдети — өзгөчө кырдаал учурунда расмий маалыматтардын бирдиктүү таралышын камсыз кылуу жана ар кандай мамлекеттик органдардын билдирүүлөрүндөгү карама-каршылыктарды жоюу болуп саналат.

  • Расмий спикерлерди аныктоо
  • Брифингдерди жана пресс-конференцияларды уюштуруу
  • Расмий билдирүүлөрдү жана түшүндүрмөлөрдү даярдоо
  • Мамлекеттик ведомстволордун жарыяларын координациялоо

Маалыматтык мейкиндикти көзөмөлдөө

Медиаштабдын ишинин өзүнчө багыты — маалыматтык мейкиндикти мониторингдөө болот. Алар маалымат каражаттарындагы, социалдык тармактардагы жана мессенджерлердеги билдирүүлөрдү, ошондой эле калктын реакциясын байкап, ушак-аңгекилерди аныктоо жана текшерүү менен алектенет.