Кыргыз Республикасынын Өкмөтү белгилеген №515-т буйрук боюнча «Кыргызкомур» ачык акционердик коомуна Баткен облусунун Лейлек районундагы Майдын-Тоо көмүр кенинде геологиялык изилдөөлөрдү жүргүзүү укугу берилди.
Изилдөө жүргүзүлүүчү аянттын жалпы көлөмү 145 гектарды түзөт. Компания аталган аймакта көмүр запастарын тактоо жана изилдөө иштерин баштайт.
Мындан сырткары, «Кыргызкомур» изилдөөлөрдүн алдында тарыхый жана маданий мурастардын бар-жогун аныктоочу расмий корутунду алууга милдеттүү. Бул талап Кыргыз Республикасындагы «Тарыхый-маданий мурастарды коргоо жана пайдалануу жөнүндө» мыйзамга ылайык жүргүзүлөт.
Буйрукка ылайык, өкмөткө караштуу Президенттин жана Өкмөттүн чечимдерин аткарууну көзөмөлдөө башкармалыгы ушул максат менен кабыл алынган чаралардын аткарылышын көзөмөлдөйт.
