Айыл чарба министрлиги Иссык-Көл жана Сон-Көлдө балык уулоого мораторийди 3 жылга узартуу тууралуу долбоорун коомдук талкууга койду. Бул мораторий учурдагы экологикалык кырдаалды турукташтыруу максатында сунушталууда.
Министрликтин маалыматына караганда, азыркы нормативдер аквакультуранын бардык аспектилерин толук камтыбайт. Ошондуктан мораторийди гана киргизүү жетишсиз, ошондой эле финансылык колдоо жана көзөмөлдү күчөтүү керек.
Жылдар бою улантылган интенсивдүү жана мыйзамсыз балык уулоо, ошондой эле табигый жайгашкан нерест жерлеринин кыскарышы, интродукцияланган балык түрлөрү жана башка антропогендик таасирлерден улам өтө маанилүү балык түрлөрүнүн запастары кескин азайган.
2023-жылы 10-июлдагы президенттин жарлыгы менен ишке киргизилген мораторий балык запастарын толук калыбына келтирүүгө багытталган. Ал натыйжасында балык уулоонун басымы азайган, балыктардын табигый көбөйүү шарттары түзүлгөн жана жасалма көбөйтүү иштери жүргүзүлүп келет.
