Баткен шаарынын тургуну Султанмурат Латиповдун короосунда 8 түп лимон дарагы өсөт. Ар жылы түшүмгө жараша баа коюлуп, аны жергиликтүү тургундар сатып алышат. Өткөн жылы түшүм аз болгондуктан, сатууга чыгарылган эмес. Быйыл болсо, фермердин айтымында, түшүм өткөн жылга салыштырмалуу жакшы.

Биздин короо өзү эле кичинекей, ошондуктан аны күнөсканага айландырдык. Ичинде 7–8 жылдык лимон көчөттөрү өсөт. Жыл сайын түшүм ар кандай болот: бир жылы жакшы, кээде азыраак. Быйыл өткөн жылга салыштырмалуу баары жакшы. Өткөн жылы түшүм аз болгондуктан саткан жокпуз. Сатууга чыгарганда жергиликтүү базарларда сатабыз. Тонналап жыйнабайбыз, ар кандай болот.
Султанмурат Латипов, багбан

Лимон дарагы көп эмгекти талап кылат. Мезгил-мезгили менен бутоо жүргүзүлөт, анткени жапайы бутактар өсүп чыгат. Алар тикенектүү жана мөмө бербейт. Мындан тышкары, лимон дарагы жылына эки жолу мөмөлөйт.

Жылуу климаттын аркасында өткөн жылы байланган мөмөлөр азыр гана бышып жатат. Алар узак убакыт бою жашыл бойдон туруп, жакында эле саргайган. Гүлдөө мезгилинде лимон дарагы өрүк дарактары менен бирге бүчүр байлап, анын жыты сирендин жытындай болот.

Азыр анын жытына таң калып жатасыз, бирок гүлдөө мезгилинде укмуш жыт болот. Ал биздин өрүк дарактарыбыз менен бирге гүлдөп, бүчүр байлайт, ал эми октябрь-ноябрда бышат. Гүлдөө учурунда жыт сирендикиндей болот. Бактын жанында мейманкана бар, ал жакка келген коноктор сөзсүз түрдө...
Султанмурат Латипов, багбан

Латипов лимондон тышкары апельсин жана башка гүлдөрдү да өстүрөт. Анын айтымында, лимон өстүрүү тажрыйбасы ага башка өсүмдүктөрдү багууга да жардам берет.