CentralAsia (CA) басылмасынын маалыматына ылайык, АКШда алдыдагы аптада «жылуулук куполу» деп аталган кубулуштан улам өтө ысык аба ырайы күтүлүүдө. Температура Цельсий боюнча +47 градуска чейин жетиши мүмкүн.
AccuWeather синоптиктеринин болжолуна караганда, Аризона штатындагы Финикс шаарында абанын температурасы +47 градуска чейин жетет. Ысык бир нече күн бою сакталат: дүйшөмбүдөн бейшембиге чейин +44-45 градус, ал эми июль айынын акыркы күнү жана август айынын биринчи күнү +47 жана +46 градус күтүлүүдө. Түнкүсүн абанын температурасы +33-34 градусту түзөт.
Мындай ысык аба ырайы Канзас-Сити, Сент-Луис жана Мемфис сыяктуу бир катар ири шаарларга да таасирин тийгизет. Жогорку нымдуулук менен бирге температура чыныгы көрсөткүчтөн да жогору сезилиши мүмкүн.
Адистердин эскертүүсү боюнча, мындай шарттарда сыртта узак убакыт болуу ысыктын талмасына, суусузданууга, ысыктан чарчоого жана ысык урууга алып келүү коркунучун жогорулатат.
