АКШ Мамлекеттик департаментинин маалыматына ылайык, бул жаңы саясат киберчабуулдарга, интернет алдамчылыкка, сексуалдык шантажга жана АКШ жарандарына зыян келтирген башка кылмыштуу схемаларга катышкан адамдарга карата колдонулат. Максат — киберкылмыштуулуктан жана алдамчылыктан пайда көргөн адамдардын АКШга киришине чектөө коюу, ошондой эле эл аралык кылмыштуу уюмдарга басымды күчөтүү.
Чектөөлөр АКШнын Иммиграция жана жарандык жөнүндө мыйзамынын 212(a)(3)(C) бөлүмүнө ылайык киргизилет. Айрым учурларда, бул визалык чаралар жогоруда аталган мыйзамсыз иштерге байланыштуу адамдардын үй-бүлө мүчөлөрүнө да жайылтылышы мүмкүн.
Мамлекеттик департамент АКШ бийлиги кылмыштуу тармактар менен күрөшүү үчүн кошумча куралдарды, анын ичинде санкцияларды, кылмыш иштерин козгоону, активдерди камакка алууну, экстрадициялоону жана укук коргоо органдарынын эл аралык кызматташтыгын колдонууга ниеттенип жатканын белгиледи.
Мамлекеттик департаменттин маалыматы боюнча, көбүнчө кытайлык трансулуттук кылмыштуу уюмдардын көрсөтмөсү менен иш алып барган алдамчылар 2024-жылы эле АКШ жарандарынан кеминде 10 миллиард долларды алдап алышкан. Ведомство мындай иш-аракеттер коррупцияга, акчаны адалдоого жана адам сатууга өбөлгө түзөрүн билдирди.
