Жумгала райондук тарыхый-этнографиялык музейинде «Үркүндүн көз жашы» аттуу эстелик кечи өткөрүлдү. Turmush корреспондентинин билдирүүсүнө караганда, музей кызматкерлери тарабынан уюштурулган бул иш-чарада ата-бабалардын тарыхы жана уруулардын эрдиктери кеңири чагылдырылды.
Иш-чаранын жүрүшүндө жергиликтүү уруулардын тарыхчылары тарабынан чогултулган илимий изилдөөлөр жана маалыматтар сунушталды. Өзгөчө, Жумгала өрөөнүндөгү төрт уруунун Үркүн учурундагы иш-аракети тууралуу айтып берип, Мырзабек, Түркмөн, Көкүмбай жана Баялы акелердин өз элин коргоодогу баатырдыктары жана алардын коомго тийгизген таасири жөнүндө маалымат берилди.
Ошондой эле Түлкү, Качыке жана Байзаке аттуу баатырлардын калмыктарга каршы күрөшү жана өз жерин коргоо үчүн жасаган аракеттери тууралуу айтылды.
Тарыхый реликвиялар
Музейге көптөгөн кымбаттуу тарыхый буюмдар жана археологиялык табылгалар жеткирилген. Алардын арасында кылымдар бою сакталып калган тарыхый баалуулуктар бар.
Музейге Кызыл-Жылдыз айылынан баатыр Моту колдонгон, жашы 100 жылдан ашык болгон кичинекей юрта алып келишкен. Мындан тышкары, 150 жыл мурун колдонулган юртанын керегеси, 100 жылдык бала бешиги, Кызарт айылынан келген оймолонгөн таштар жана башка баалуу археологиялык буюмдар көрсөтүлдү.
Иш-чарага райондун жетекчилиги, маданият, билим берүү жана дин чөйрөсүндөгү өкүлдөр катышып, музейдеги тарыхый экспонаттар менен таанышты.
