Улуттук банктын башкармалыгы чет өлкөлөрдө филиалдар аркылуу иш алып барган коммерциялык банктардын капиталына карата кошумча талаптарды белгиледи. Бул боюнча 2026-жылдын 12-ноябрында №2026-П-17/59-1-(НПА) токтом кабыл алынып, ал кабыл алынган күндөн тартып күчүнө кирди.
Жаңы эрежелерге ылайык, чет өлкөдөгү филиалдын ишмердүүлүгүнүн биринчи финансылык жылынын жыйынтыгы боюнча банк өзүнүн уставдык капиталын ошол филиалдын жалпы активдеринин кеминде 3 пайызына көбөйтүүгө милдеттүү.
Кийинки ар бир финансылык жылдарда капиталдын өсүшү чет өлкөдөгү филиалдын жалпы активдеринин өсүшүнүн кеминде 3 пайызын түзүшү керек. Эгерде филиалдын активдери өспөй калса, банк баары бир капиталды биринчи финансылык жылдагы активдердин 3 пайызы өлчөмүндө жогорулатууну улантат.
- Эгерде банктын бир нече чет өлкөлүк филиалы болсо, капиталды көбөйтүү талабы ар бир филиал боюнча эсептелген суммалардын суммасы катары эсептелет.
- Капиталды эсептелген суммага көбөйтүү мөөнөтү тиешелүү финансылык жылдан кийинки жылдын 1-октябрынан кечиктирилбеши керек.
Бул чечим чет өлкөлөрдө иш алып барган банктардын капиталдашуусун күчөтүү максатында кабыл алынган.






