Президент Садыр Жапаров Сокулук районунун тургундары менен жолугушууда Түз айылынын тургуну Бакыт Сармановдун кайрылуусун укту. Ал айылга жакын жердеги 16 гектар жердин трансформация маселеси 2008-жылдан бери чечилбей келе жатканын айтты.
Сармановдун айтымында, 2008-жылы райондук кеңеш тарабынан жер участогун трансформациялоо боюнча чечим кабыл алынып, архитектуралык корутундулар жана башка адамдардын укуктары бузулбагандыгын тастыктаган документтер даярдалган. Бирок айыл чарба жерлерин трансформациялоого киргизилген мораторийден улам процесс токтоп калган.
Ал участоктун азыркыга чейин максаттуу пайдаланылбай жатканын жана иштетилбегенин кошумчалады. Ошол эле учурда айылда 130га жакын үй-бүлө жашайт, ал эми калктуу конушту кеңейтүү жана турак-жай куруу үчүн жер участокторун берүү мүмкүнчүлүктөрү чектелүү бойдон калууда.
Садыр Жапаров кайрылууну угуп, Сокулук районунун акиминен жер участогунун тарыхын сурады. Аким 2008-жылы трансформация маселеси карала баштаганын, бирок мораторийден улам токтотулганын тастыктады. Ошондой эле ал участок мурда турак-жай долбоорлорун ишке ашыруу үчүн каралганын, бирок анын жайгашкан жери чечимди кийинкиге калтырууга таасир эткен факторлордун бири болгонун билдирди.
Президент жер ресурстарын үнөмдөө зарылдыгын белгилеп, пайдаланылбаган участокко беш кабаттуу үйлөрдү куруу мүмкүнчүлүгүн кароону сунуштады. Бул ыкма айылдагы турак-жай маселесин жерди горизонталдуу кеңейтүүсүз эле чечүүгө мүмкүндүк берет.
