13-июлда Ноокен районунун Кочкор-Ата шаарында жана Бостон, Курулуш, Коп-Там айылдарында күчтүү жамгырдан кийин сел агымдары жүрдү.
Сел агымдары 417 турак үйдүн короосун, ал эми 80 үйлөрдүн ичин суунун каптап кетишине себеп болду.
Ошондой эле төрт кафе, мечит, беш авто тейлөө станциялары, эки автомойка жана бир бала бакчанын аянты селден жабыркады.
Ноокен районунда өзгөчө абал режими киргизилип, кырсыктын кесепеттерин жоюу жана калыбына келтирүү иштери уланууда.
Авариялык калыбына келтирүү иштерине 451 адам, анын ичинде 350 райондук эл коргоо кызматкерлер жана 101 Өзгөчө кырдаалдар министрлигинин куткаруучусу тартылган.
Жумуштарга 22 бирдик салмактуу инженердик техника колдонулууда.
Азыркы учурда социалдык объектилер жана үйлөр селден калган унааларды тазалоо иштери уланууда.
Министрлик жергиликтүү тургундарды коопсуздук эрежелерин сактоого жана 112 кызматка тезинен кабарлоого чакырууда.
