Кочкор районундагы Шапак Рысмендеев атындагы мектепте Тарых жана ата-бабалардын эс тутуму күндөрү алкагында «1916-жылдагы улуттар аралык көтөрүлүш: Үркүн элдин эс тутумунда» деген темада конференция өткөрүлдү. Иш-чарага райондук мамлекеттик администрациясынын жетекчилиги, билим берүү тармагынын өкүлдөрү, мугалимдер жана окуучулар катышты.
Конференциянын жүрүшүндө Прага шаарынан (Чехия) онлайн байланыш аркылуу тарых илимдеринин доктору, профессор Тынчтыкбек Чоротегин чыгып, тарыхтагы ата-бабалардын эс тутумуна арналган сөз сүйлөдү.
Окуучулардын докладдары
Мектеп окуучулары тарыхый окуяларга терең талдап, төмөнкү темалар боюнча илимий докладдарды сунушташты:
- «1916-жылы кыргыз элинин тарыхындагы маанилүү окуялар»
- «1916-жылдагы улуттар аралык көтөрүлүш: Үркүн элдин эс тутумунда»
- «1916-жылдагы көтөрүлүштүн жетекчилери жана кыргыз манаптарынын ролу»
- «Үркүн учурундагы качкындардын оор тагдыры»
Музейдеги көргөзмө
Иш-чаранын экинчи бөлүгү мектептин тарыхый-этнографиялык краеведдик музейинде уланды. Ал жерден катышуучулар тарыхый-маданий мураска, улуттук баалуулуктарга, элдик кол өнөрчүлүктүн үлгүлөрүнө жана Кыргыз мамлекетинин түзүлүшүнө арналган көргөзмөлөрдү көрүштү.
Тарыхый маалыматтарга таянсак, 1916-жылдагы көтөрүлүш учурунда кыргыздар Россиянын колониалдык саясатына каршы туруп, ичкилик жол менен хан жана жоокербашыларды шайлаган. Кочкор өрөөнүндө Канат Ыбыке уулу (Канат-хан) Тянь-Шань (Нарын, Кочкор) регионундагы көтөрүлүштүн башкы жетекчиси жана башкы командири болгон. Ал Кочкор өрөөнүндөгү Ийри-Суу аймагында хан деп жарыяланган.
