Финансы министрлиги 2026-жылга республикалык бюджеттин мамлекеттик баалуу кагаздар боюнча пайыздарды төлөөгө кеткен чыгымдары боюнча прогнозун 5,3% кыскартты. Бул тууралуу маалымат министрлик тарабынан такталган республикалык бюджеттин долбооруна тиркеме катары киргизилген.
Буга чейин ведомство баалуу кагаздар боюнча пайыздарды төлөөгө 27 млрд сомго жакын каражат бөлүүнү пландаган. Жаңы прогноз 25,6 млрд сомду түзөт. 2025-жылы бул максатка иш жүзүндө 16,6 млрд сом сарпталган.
Министрлер кабинети 30-октябрда 2026-жылга такталган республикалык бюджеттин долбоорун парламенттин кароосуна киргизди.
Мамлекеттик баалуу кагаздардын түрлөрү
Министрлер кабинетинин мамлекеттик баалуу кагаздарды чыгарууну жөнгө салган токтомуна ылайык, мамлекеттик казыналык векселдер (МКВ) кыска мөөнөттүү, пайызсыз (дисконттуу) баалуу кагаздар болуп саналат. МКВнын жүгүртүү мөөнөтү 1 айдан 12 айга чейин, ал эми жүгүртүү мөөнөтү күн менен эсептелгенде ар дайым 7ге эселүү болушу керек. Мисалы, 1 айлык МКВ үчүн 28 күндөн баштап, 12 айлык МКВ үчүн 364 күнгө чейин. Бир МКВнын номиналдык наркы 100 сомду түзөт.
Мамлекеттик казыналык облигациялар (МКО) — пайыздык кирешелүү (купондуу) узак мөөнөттүү баалуу кагаздар. МКОнун жүгүртүү мөөнөтү 1 жылдан ашат. Бир МКОнун номиналдык наркы жана ар бир чыгарылыштын параметрлери чыгаруу учурунда Финансы министрлиги тарабынан аныкталат. Чыгаруу документтик жана документсиз түрдө жүргүзүлөт. Финансы министрлиги МКОну кыргыз сомунда жана чет өлкө валютасында чыгарууга укуктуу.
