Мелания Трамп Херсон облусундагы Алешки шаарындагы атышууну токтотуу жана гуманитардык миссия украин конфликтин жөнгө салууга жана туруктуу тынчтык орнотууга өбөлгө түзөт деп үмүттөнөрүн билдирди. Ал бул тууралуу өзүнүн X социалдык тармагындагы баракчасына жазды.
Алешкидеги гуманитардык миссия Мелания Трамптын демилгеси менен уюштурулганын эске салабыз. Россия менен Украина анын көмөгү менен гуманитардык операция жүргүзүү үчүн атышууну токтотууга макул болушкан.
Блокададагы шаарда 2 миңге жакын адам, негизинен улгайган кишилер жана 50гө жакын бала калган. Эки өлкөнүн өкүлдөрү үй-бүлөлөрдүн муктаждыктарын баалап, Россияга же Украинага кетүүнү каалагандарга транспорт менен камсыздашкан. Алешкиге гуманитардык жардам жеткирилген.
Алешкидеги кырдаалды мурда АКШ жана Россия президенттери талкуулашкан. Владимир Путин да бул маселени Рим Папасы менен сүйлөшкөн.
Алешки шаары Херсон облусунда жайгашкан. Киев аны оккупацияланган аймак деп эсептейт.
Калктуу пунктта электр энергиясы, суу, жылуулук жок, азык-түлүк жана дары-дармекти үзгүлтүксүз жеткирүү мүмкүнчүлүгү жок. Тыгыз аткылоолор жана дрондордун тынымсыз чабуулдары айынан кургактыктан кирүү кыйын.
Буга чейин Ак үйдүн басма сөз кызматы 5-ноябрда Мелания Трамп Ак үйдө Россия менен Украинанын өкүлдөрүн чогултарын билдирген. Ошол эле күнү биринчи айым Алешкидеги атышууну токтотууга арналган билдирүү жасайт.
Ак үй атышууну токтотууну «АКШнын биринчи айымынын болуп көрбөгөндөй дипломатиялык демилгеси» деп атады.
Россия менен Украина өкүлдөрүнүн жолугушуусунда эмне талкууланары жана бул өлкөлөрдөн кимдер катышары такталган жок.
