Ак-Суу районунун Сары-Камыш айылынын 26 жаштагы тургуну Улукбек Жапарбеков бала кезинен эле жылкыларды жакшы көрөрүн билдирди.

Айылыбызда чоңойгондуктан, ар бир үйдө мал болгон. Бала кезимден жылкыларды абдан жакшы көрчүмүн, кулундар менен ойноп чоңойдум десем болот. Андан кийин Береке деген атка ээ болгон атымды көк бөрү оюнуна даярдап, улак тартышка катышып келем. Элибиз илгертеден бери ат — адамдын канаты деп бекеринен айткан эмес. Көчмөн элдин жашоосунда ат күнүмдүк жумуштарды бир топ жеңилдеткен. Азыр унаалар болсо да, жылкылар жашообуздун маанисин жоготкон жок. Унаалар өтө албаган тоолуу жерлерге биз ат менен жете алабыз. Студент кезде гид болуп иштеп, чет элдик туристтерди Алтын-Арашан капчыгайына жана тоо көлдөрүнө ат менен алып барчумун.
Улукбек Жапарбеков

Улукбек кесиби боюнча энергетик болгонуна карабастан, учурда кесиби менен эмес, сүйгөн иши менен алектенүүдө.

Ооба, энергетика тармагында билим алдым. Бирок айтканымдай, студенттик жылдардан бери гид болуп иштеп, аймагыбыздын өнүгүүсү үчүн туристтик багытты тандадым. Ак-Суу району туризм багытын алган соң, ар бир айыл өнүгүшү керек. Тейлөөнү жакшыртып, эс алуучулар үчүн сапаттуу жана жаңы шарттарды сунуштоо зарыл. Идеяларды издөөдө интернетти изилдеп, жыл бою иштеген тоо лыжа базасын ачууну чечтим. Аны түзүүдө жасалма дөбөлөрдү жасоого туура келген жок – бизде өзүбүздүн тоолор бар. Эгерде биз жаратылыш байлыгыбызды жана туулган жердин кооздугун пайдалансак, көп нерсеге жетишүүгө болот.