Кыргызстанда «10» регион коду менен катталган легализацияланган унааларды сатууга, башка адамга каттоону өткөрүүгө жана өлкөдөн чыгарууга тыюу салынды. Бул тууралуу Мамлекеттик унааларды каттоо борборунун Транспорттук каражаттарды каттоо жана айдоочулук курам бөлүмүнүн башкы адиси Талайбек Суланалиев радио эфиринде билдирди.
Анын айтымында, мындай унааларга мамлекеттик каттоо номерлери «10» регионинин коду менен берилет жана маалымат системасына атайын чектөөлөр тууралуу белгилер киргизилет. Унааны айдоого гана бир менчик ээси укуктуу жана бир адамга бир унаа берилет.
Мындан тышкары, ушул категориядагы унааларды Казакстан, Россия же башка өлкөлөргө чыгарууга тыюу салынат. Чет өлкөгө чыгаруу толугу менен тыюу салынып, унаа Кыргызстандын аймагында гана колдонууга арналган.
Легализацияланган унааларды сатууга, белекке берүүгө, ишеним кат менен кабыл алууга же ижарага берүүгө мүмкүн эмес. Бирок, эгер менчик ээси каза болгон учурда же чектелген жөндөмдүүлүк алынса, унааны жакын туугандарына мурас катары өткөрүп берүү жолдору каралган.
