Материалдар: 2
Кыргызстанда кыргыз тилин өнүктүрүү программасын 2026–2028-жылдарга чейин кеңейтүү пландаштырылып жатат. Ушул планда мобилдик тилдик колдонмолорду жакшыртуу, балдар үчүн мультфильмдер жана жомоктор сыяктуу билим берүү контентин түзүү, ошондой эле кыргыздын байыркы жазуусун үйрөнүү үчүн колдонмо иштеп чыгуу каралган. Бул долбоор мамлекеттик тилди санариптик, билим берүү, маданият жана медиа чөйрөсүндө өнүктүрүү боюнча кошумча чараларды камтыйт.
Кыргыз тилинин мамлекеттик программасын каржылоого кошумча каражат бөлүп, анын көлөмүн 354,6 миллион сомдон 577,1 миллион сомго көтөрүү сунушталууда. Бул каражаттар мультфильмдерди түзүүгө, билим берүүчү мобилдик тиркемелерге жана санариптик платформаларды иштеп чыгууга багытталат. Маселе боюнча министрлер кабинетинин актысынын долбоору коомдук талкууга коюлган.
