Кыргызстандын жарандары жаңы «Цифрлуу чек ара» мобилдик колдонмосу аркылуу чек ара пункттарындагы коррупция жана кызматкерлердин мыйзам бузуулары тууралуу маалымат бере алышат.
Чек ара көзөмөлдөө башкы башкармалыгы билдиргендей, колдонмодо «Пикир калтыруу» бөлүмү бар. Ал жерден колдонуучулар каттоо түрүн тандап, анын ичинде коррупция тууралуу кабар бериши мүмкүн. Ар бир билдирүү оператордун көзөмөлүндө болот.
Бул функция аркылуу жарандарыбыз кызматкерлердин кемсинтүү же коррупциялык аракеттерине каршы туруп, андай фактыларды системага жеткире алышат. Ар бир келтирилген билдирүү чек ара кызматынын ички мыйзамдарына ылайык каралат.
«Цифрлуу чек ара» колдонмосу чек ара бекеттеринин иштеши, мамлекет чек арасын кесип өтүү эрежелери, чыгарылууга убактылуу чектөөлөр бар-жогу тууралуу маалыматтарды да берет.
Азырынча колдонмо Android үчүн жеткиликтүү, ал эми iPhone түзмөктөрү үчүн App Store дүкөнүнөн колдонмонун версиясы июль айынын аягына чейин чыгуусу күтүлүүдө. Ошондой эле веб-нускасы иштеп жатат.
