Кыргызстанда Салык кодексине 113 түзөтүү киргизүү пландалууда. Бул өзгөртүүлөр катардагы жарандарга да, бизнеске да таасирин тийгизиши мүмкүн. Депутат Дастан Бекешев сунушталып жаткан негизги өзгөрүүлөр тууралуу айтып берди.

Эң көрүнүктүү өзгөрүү – эгерде жеке адамда же компанияда таанылган, бирок төлөнбөгөн салык карызы бар болсо жана салык кызматы төлөм талабын койгон болсо, банктар жана төлөм кызматтары салык органдарына эсептердеги жана электрондук капчыктардагы акча каражаттарынын калдыктары жана кыймылы жөнүндө маалымат берүүгө милдеттүү болушат.

Мындан тышкары, салык кызматы бизнестин товарларды кайдан алып жатканын так көргүсү келет. Кодекске «товарсыз жеткирүү» жана «товардын келип чыгуу булагы» деген түшүнүктөрдү киргизүү сунушталууда. Башкача айтканда, эгер товар документтерде гана бар болуп, чыныгы жеткирүү болбосо, мындай операция товарсыз деп таанылышы мүмкүн.

Дагы кандай өзгөртүүлөр күтүлүүдө?

  • Салык текшерүүлөрүндө кызмат бизнес колдонгон фискалдык программалардын маалыматтарына кирүү мүмкүнчүлүгүн алат.
  • Эгер адам каза болсо, анын салык милдеттенмелери жана карыздары каза болгон күндөн тартып токтотулат. Салык кызматы бул маалыматты калктын мамлекеттик реестринен автоматтык түрдө ала алат.
  • Катталбаган турак эмес объектилерди эсепке алуу башталат, электромобилдерди коммерциялык кубаттоо үчүн өзүнчө эрежелер белгиленет.
  • Жеке операторлорго электрондук салык кызматтарын көрсөтүүгө уруксат берилет.
  • Отчеттуулуктун бир бөлүгү толугу менен санарипке өткөрүлүп, кагаз документтерди талап кылуу азаят.