2026-жылдын 18-августунда Кыргыз Республикасынын Эмгек, социалдык камсыздоо жана миграция министрлигинин Республикалык протез-ортопедия борборунда Cochlear компаниясынын заманданган сөз процессорлорун угуу жетишсиздиги бар балдарга тапшыруу аземи өтөт.
Бул жабдуулар биринчи жолу түздөн-түз Австралиянын өндүрүүчүсүнөн сатып алынып, мамлекеттик бюджеттен 30 миллион сомго каржыланууда. Азыркыга чейин мындай жардам расмий түрдө Кыргызстанда берилген эмес.
Сөз процессору кохлеардык имплант системасынын тышкы бөлүгү болуп саналат. Ал айланадагы үндөрдү кабыл алып, сигналга айландырып, импланттын ички бөлүгүнө жиберет. Натыйжада, угуу мүмкүнчүлүгү чектелген адамдарга үн жана сөздү угууга шарт түзүлөт.
Аземге министрликтин жетекчилери, бейтаптардын ата-энелери жана адистер катышып, процессорлордун орнотулушу жана өзгөчө жөндөөлөрү боюнча атайын кеңеш берүүлөр болот.
