25-июль Кыргыз-Орус Славян университетинин бүтүрүүчүлөрү үчүн унутулгус күн болду, анткени КРСУ өзүнүн 33 жылдык тарыхында биринчи жолу жалпы университеттик бүтүрүү кечесин "Жаштык Арена" стадионунда өткөрүп, ага 4,5 миңден ашык адам катышты.
Бул майрамдык концертте бүтүрүүчүлөрдү Жогорку Кеңештин төрагасы Марлен Маматалиев, Россиянын элчиси Сергей Вакунов, КРСУнун ректору Сергей Волков, Илим, жогорку билим берүү жана инновациялар министринин орун басары Дурус Козуев, ошондой эле Россиянын Илим жана жогорку билим берүү министринин орун басары Ольга Петрова куттукташты.
Быйыл бакалавриат, специалитет, магистратура, ординатура, колледж жана КРСУнун мектебин бүтүргөн 1128 бүтүрүүчү жогорку билим тууралуу дипломдорго ээ болушту. Окуудагы, илимдеги, коомдук, чыгармачылык жана спорттук ишмердүүлүктө өзгөчөлөнгөн мыкты студенттер университеттин өнөктөштөрүнүн атайын сыйлыктары менен белгиленди.
Бүтүрүү кечесинин өнөктөштөрүнүн бири болгон "Евразия" автономдуу коммерциялык эмес уюму КРСУнун бүтүрүүчүлөрүнө Россиянын жана Беларустун артисттери катышкан майрамдык концерт тартуулады. Jax 02.14, Александр Волкодав, россиялык "Пицца" тобу жана белоруссиялык ырчы Hollyflame өздөрүнүн аткаруулары менен студенттерди, алардын ата-энелерин жана кеченин ардактуу конокторун кубандырышты.
"Евразия" АКОнун атынан Россиянын Мамлекеттик Думасынын депутаты, "Евразия" АКО Кеңешинин төрагасы жана КРСУнун Камкорчулар кеңешинин мүчөсү Алёна Аршинова видеокуттуктоо менен кайрылды.