Гульчо шаарындагы №2 бала бакчанын алдындагы аймак курулуш иштеринин бүтпөгөндүгүнөн улам ылайга айланган. Жашоочулардын айтымында, бул жол балдарды бакчага алып баруу үчүн жалгыз жол болуп саналат.
Турмуштун маалыматы боюнча, жашоочулар бул жерде жаз айларында жол курулушу башталганын, бирок иштер азырынча аягына чыкпагандыгын белгилешет. Кечээки жамгырдан кийин аймак толугу менен ылай болуп, балдар бакчага баратканда кийимдери жана буттарын булгап жатышат. Ошол эле учурда бул жол аркылуу улуу трафик өтөт.
Аталган аймакта Алымбек датка көчөсү кеңейтилип, төрт тилкелүү жол болуп түзүлгөн. Бул иштердин алкагында 2,7 чакырым асфальт төшөлгөн жана кыймыл ачык. Бирок жолдун болжол менен 1 километри суу болуп кеткендиктен, дренаждык иштер жүргүзүлгөн.
Жол курулушу боюнча маалымат
Гульчо шаарынын мэри Нурсултан Тажибаев жарандардын кайрылуулары түшкөнүн жана бул маселе боюнча Транспорт министрлигине билдирүү жөнөтүлгөнүн билдирди. Жолду Транспорт министрлиги куруп жатат.
Транспорт министрлигине караштуу жол чарбалык департаментинин №5 Ош облустук аймактык башкармалыгынын башчысы Нуртилек Жетимишовдун маалыматына ылайык, мурда суу түтүгү менен байланыштуу маселе жаралган. Учурда кызматкерлер окуя болгон жерге чыгышты.
