Америкалык университеттин профессору, Түп районунун тургуну Улан Дакеев John Deere компаниясында жана NASAнын изилдөөлөрүндө эмгектенген. Ал 24.kg маалымат агенттигине берген маегинде өзүнүн жашоосу, технологиялар жана илим тууралуу кызыктуу ойлору менен бөлүшкөн.
Балалыгы жана билимге умтулуусу
Улан Дакеев Ысык-Көл облусунун Түп айылында карапайым үй-бүлөдө чоңойгон. Анын эки эжеси жана бир иниси бар. Алардын үйүндө билим алуу ар дайым биринчи орунда турган.
Бала кезинен бош убактысы аз болгон. Үй жумуштарына жардам берип, өсүмдүктөрдү сугарып, малга кам көрүп, ар кандай тапшырмаларды аткарып турган. Ушундай жол менен тартип жана башталган ишти аягына чыгаруу адаты калыптанган.
Атасы экскаваторчу болуп иштеп, техниканы өзү оңдоп турчу. Ал эми совет мезгилинде оор жүк ташуучу унааларда көп жолго чыккан. Бир жолу ал айдоочудан башка унааны айдай алабы деп сураганда, айдоочу каалаган унааны айдай аларын айткан. Бул балага сыйкырдуу көрүнгөн. Ошондон улам механизмдердин кандай иштээрин түшүнүп, аларды башкарууга умтулуусу пайда болгон.
Илимий карьерага карай жол
Кыргыз айылынан чыккан жигиттин америкалык университеттин профессору болуп калышындагы чечүүчү кадамдардын бири Тбилисиге окууга кеткени болгон.
