12-13-октябрда Бишкектеги Улуттук эне жана бала коргоо борборунун базасында (Джал кичирайону) тубаса өнүгүү кемтиги бар балдарды Германиянын клиникаларында акысыз дарылоого тандоо өтөт. Бул — Friedensdorf International эл аралык кайрымдуулук уюмунун катышуусундагы 10-ирет өтүп жаткан акция.

Акция Кыргызстандын Саламаттык сактоо министрлиги менен «Вместе к здоровью» коомдук фондунун ортосундагы кызматташтык келишиминин алкагында өткөрүлөт.

Friedensdorf International оорулуу балдарга жардам көрсөтүп, аскердик жаңжал коркунучу бар жана социалдык абалы төмөн 20дан ашуун өлкө менен кызматташат. 40 жылдан ашуун убакыттан бери Ооганстанда, 35 жылдан бери Тажикстан, Армения, Грузияда акциялар өтүп келет, Өзбекстан 20 жылдан ашуун кызматташат. Кыргызстан биринчи жолу 2013-жылы кошулган.
Билдирүүдөн

Кыргызстандагы акциялардын негизги милдети — аз камсыз болгон үй-бүлөлөрдөгү оорулуу балдарга жардам берүү: ата-энелерге кеңеш берүү, диагностика жана операциялык дарылоо үчүн балдарды Германияга акысыз тандоо.

«Вместе к здоровью» фонду 12 жылдан бери бардык аймактарда кароолорду өткөрүп келет. Тандоонун негизги критерийи — патологияны Кыргызстандын клиникаларында дарылоо мүмкүн эместиги.

Акцияга ар кандай дарты бар аз камсыз болгон үй-бүлөлөрдөн балдар чакырылат. Адистер кеңеш берип, андан ары диагностика жана операциялык дарылоо үчүн балдарды Германияга акысыз тандоону жүргүзүшөт.

Дарек: Улуттук эне жана бала коргоо борбору, Джал, Бишкек.