Чүй облусундагы "Алтынкен" алтын казган ишканасынын аймагында кытай тилде жазылган чоң жазуу алып салынууда. Бул жазуу 2015-жылдан бери тоонун боорунда болгон.
Жазуу социалдык тармактарда чыккан сүрөттөрдөн кийин кызуу талкууга жем таштады. Анын мазмуну "Алтын менен күмүш эмес, кооз тоолор жана дарыялар да керек" деп которулат.
Ишкананын экология боюнча адиси Нурсуланбек Абдысадыковдун айтымында, 2015-жылы ишканада кызматкерлердин 60% кытай жарандары болгондуктан жазуу кыргыз жана кытай тилдеринде жасалган.
Азыркы учурда ишкананын 95% кызматкерлери кыргызстандыктар экени белгилүү болду. Жазуунун максаты — табиятты, тоолорду жана суу ресурстарын коргоого чакыруу болгон.
Ишкананын жетекчилиги коомдогу пикир келишпестиктерди эске алып, жазууну алып салуу чечимин кабыл алган.
