73 жашында көрүнүктүү мамлекеттик ишмер Мыктыбек Абдылдаев дүйнөдөн кайтты – некролог

‹›

Кыргыз коомчулугу оор жоготууга учурады. 73 жашында белгилүү коомдук жана мамлекеттик ишмер, Жогорку Кеңештин депутаты, милициянын генерал-лейтенанты Мыктыбек Абдылдаев дүйнөдөн кайтты. Мыктыбек Абдылдаев 1953-жылдын 17-августунда Чүй облусунун Аламудун районундагы Кара-Жыгач айылында төрөлгөн. Ал 1976-жылы Кыргыз мамлекеттик университетинин филология факультетин, 1989-жылы СССР Ички иштер министрлигинин Академиясын аяктаган. 1999-жылы юридикалык илимдер боюнча кандидаттык даража алган.

Мыктыбек Абдылдаев өзүнүн эмгек жолун мамлекетке жана элге кызмат кылууга арнаган. Ички иштер органдарында көп жылдык тажрыйбасы бар, жооптуу жетекчилик кызматтарда иштеген. 1985-1990-жылдары Ысык-Көл облусунун Ички иштер башкармалыгынын орун басары, 1991-1994-жылдары башкармалыктын начальниги болуп иштеген. 1994-2001-жылдары Кыргызстандын Ички иштер министринин орун басары жана биринчи орун басары, 2001-2002-жылдары Кыргызстандын президентинин алдындагы Эл аралык стратегиялык изилдөөлөр институтунун директору, 2002-2004-жылдары президенттин администрациясында коргоо жана коопсуздук бөлүмүнүн башчысы болуп кызмат өтөгөн.

2004-жылдын октябрынан 2005-жылдын мартына чейин Кыргызстандын башкы прокурорунун милдетин аткарган, ал эми 2005-жылдын мартында Ички иштер министринин милдетин аткаруучу болуп дайындалган. 2006-жылдын 17-майынан 2007-жылдын 13-апрелине чейин Кыргызстандын президентинин администрациясын башкарган. 2010-жылдын октябрында «Ата-Журт» саясий партиясынан Жогорку Кеңештин V чакырылышына депутат болуп шайланган. 2023-2025-жылдары Кыргызстандын Элдик курултайынын Секретариятын жетектеген.

Мыктыбек Абдылдаевдин көп жылдык мамлекеттик жана коомдук ишмердүүлүгү жогорку мамлекеттик сыйлыктар менен бааланган. Ал «Жоокердик эрдик үчүн» I даражадагы медаль, «Кесиптик кызмат үчүн» I даражадагы медаль, ТМД өлкөлөрүнүн парламенттер аралык ассамблеясынын «Содружество» ордени менен сыйланган. Ага «Кыргыз Республикасынын эмгектеги юристи» наамы, мамлекеттик кызматтын 1-класстагы мамлекеттик кеңешчиси жана 2-класстагы юстициянын мамлекеттик кеңешчиси наамдары ыйгарылган.

Мыктыбек Абдылдаев кесипкөй деңгээли жогору, принципиалдуу жетекчи, жооптуу мамлекеттик ишмер жана өлкөсүнүн чыныгы патриоту катары кесиптештеринин жана коомчулуктун арасында чоң урматка ээ болгон. Анын мамлекеттүүлүктү бекемдөө, мыйзамдуулукту камсыз кылуу жана жарандардын кызыкчылыктарын коргоо боюнча жүргүзгөн эмгеги Кыргызстанды өнүктүрүүгө чоң салым кошту. Мыктыбек Абдылдаевдин жаркын элеси анын жакындарынын, досторунун, кесиптештеринин жана аны билген, урматтаган бардык адамдардын жүрөгүндө түбөлүккө сакталат. Биз маркумдун үй-бүлөсүнө, жакындарына жана туугандарына терең жана чын жүрөктөн көңүл айтабыз, орду толгус жоготууга бөлүшүп.