Арашан тукумундагы койлордун саны КРда 48 миң башка жетти. Чолпон-Атада көргөзмө өттү

‹›

Чолпон-Атада эл аралык «Арашан» койлорунун племенной көргөзмөсү өттү. Бул иш-чара Иссык-Куль облусундагы «Арашан 09» коомунун командасы тарабынан уюштурулган. Көргөзмөгө Россиянын ар кайсы аймактарынан, анын ичинде Дагестан, Ингушетия жана Түндүк Кавказдан фермерлер жана адистер катышты. Ошондой эле Казакстан, Өзбекстан жана Молдова өлкөлөрүнүн өкүлдөрү да келип, Арашан породасына болгон кызыгууну арттырышты.

Иш-чаранын жүрүшүндө Арашан породасын өнүктүрүүгө чоң салым кошкон фермерлерге министрликтин сыйлыктары тапшырылды. Арашан порода 2021-жылы расмий түрдө катталган жана жогорку эт өндүрүмдүүлүгү, эрте жетилүү жана чоң салмак менен айырмаланат. Учурда Кыргызстанда Арашан койлорунун саны 48 миң башка жетти.

Көргөзмөдө племенной мал чарбасын өнүктүрүү, экспорттук мүмкүнчүлүктөрдү кеңейтүү жана селекциялык иштерди күчөтүү боюнча маселелер талкууланды. Соңку жылдары племенной чарбаларды колдоо боюнча бир катар реформалар жүргүзүлгөнү жана племенной статус алуу шарттары жеңилдетилгени белгиленди.

Мындан тышкары, Кыргызстандын мал чарбасынын илимий-изилдөө институтунун базасында геномдук баалоо лабораториясы курулууда. 7,5 миллион долларлык долбоор 2027-жылы ишке киргизилиши пландалууда. Адистердин пикиринде, Арашан порода Кыргызстандагы мал чарба тармагы үчүн атаандаштыкка жөндөмдүү бренд болуп, эл аралык рынокторго чыгуу үчүн жаңы мүмкүнчүлүктөрдү ачууда.