Беларусьтын премьер-министри Бишкектеги экологиялык технологиялар заводун зыярат кылды

‹›

Кыргызстанга расмий сапар менен келген Беларусь Республикасынын премьер-министри Александр Турчин Бишкектеги санитардык полигонду зыярат кылды. Бишкек шаарынын мэри Айбек Джунушалиев белорус премьер-министрин тосуп алып, 2025-жылдын декабрь айында ишке киргизилген таштанды сорттоо линиясы менен тааныштырды. Бул жерде таштанды сорттолуп, кайра иштетүү үчүн экинчи сырьё катары өткөрүлөт.

Сорттолгон материалдар Фере көчөсүндөгү заводго жөнөтүлүп, ал жерде шаарды көрктөндүрүү үчүн керектүү буюмдар, мисалы, отургучтар, люктар жана башка буюмдар даярдалат. Технологиялык жабдууларды жеткирүү боюнча тендердин жыйынтыгы менен белорус компаниясы «Сифания-Экотехника» жеңишке жеткен.

Александр Турчин система эффективдүү жана логикалуу уюштурулганын белгиледи. “Бардык комплекс туура уюштурулган. Сиздерде жакшы замкнутый цикл түзүлгөн, бул таштандыны кайра иштетүү маселелерин рационалдуу чечүүгө мүмкүндүк берет”, – деди ал.

Сапар учурунда делегация таштандыны кайра иштетүү жана электр энергиясын өндүрүү боюнча экологиялык технологиялык заводду да зыярат кылды. Госторго долбоордун ишке ашырылышы, өндүрүштүк кубаттуулугу жана борбор шаар үчүн экологиялык мааниси тууралуу маалымат берилди.

Долбоор этап-этабы менен ишке ашырылууда. Биринчи этапта күнүнө 1 000 тонна таштанды иштетүүчү завод ишке киргизилди. Экинчи этапта күнүнө 2 000 тонна кубаттуулукка ээ кошумча блок куруу пландалууда. Завод толук кубаттуулукка чыккандан кийин, күнүнө 3 000 тонна катуу үй таштандысын кайра иштетип, 90 МВт электр энергиясын өндүрүүгө мүмкүнчүлүк алат.

Экинчи этаптын аякташы менен завод Борбордук Азиядагы катуу үй таштандысын кайра иштетүү жана электр энергиясын өндүрүү боюнча эң ири комплекс болуп калат. Долбоордун ишке ашырылышы Бишкектеги экологиялык абалды жакшыртууга жана шаарды экологиялык таза электр энергиясы менен камсыздоого чоң жардам берет.

Сапардын жыйынтыгы боюнча Бишкек шаарынын мэри Айбек Джунушалиев жолугушуу жана тажрыйба алмашуу эки тарап үчүн пайдалуу болгонун, ошондой эле кызматташтыктын мындан аркы өнүгүшүнө өбөлгө түзөөрүн белгиледи.