Ошто 120 миңден ашык жаштар үчүн өнүгүү жана колдоо борбору ачылды

‹›

Ош шаарында жаңы Жаштар борбору ачылды. Бул борбор шаардык мэрия тарабынан БУУнун Өнүктүрүү программасы менен биргеликте, Россия Федерациясынын каржылык колдоосу менен түзүлгөн. Борбор 120 миңден ашык жаш тургундарга кызмат көрсөтүүгө арналган.

Ачылыш аземине Ош шаарынын мэри Жанарбек Акаев, Россиянын Ош шаарындагы башкы консулу Роман Свистин жана БУУнун Өнүктүрүү программасынын туруктуу өкүлү Александра Соловьева катышты. Жаңы борбор жаштардын билим алуусуна, кесиптик өнүгүүсүнө, жаштардын демилгелерин ишке ашыруусуна жана жергиликтүү өз алдынча башкаруу органдары менен байланышына арналган аянтча болуп калат.

Бул жерде тил курстары, билим берүү жана лидерлик программалары, ошондой эле көндүмдөрдү өнүктүрүү жана экзамендерге даярдык боюнча тренингдер өткөрүлөт. Борбордун жалпы аянты 1000 чарчы метрден ашат. Ош шаардык мэриясы жаңы имаратты куруу үчүн муниципалдык бюджеттен 435 миң доллар инвестициялады. Россия Федерациясы тарабынан каржыланган долбоордун салымы 132 миң доллардан ашып, ички жасалгалоо, IT жабдууларын жана мебель сатып алууга жумшалган. Борборду түзүүгө болгон жалпы инвестициялар 525 миң долларды түзөт.

Жанарбек Акаевдин айтымында, борбор жаштарга көндүмдөрүн өнүктүрүү, идеяларын ишке ашыруу жана шаардык коомдук жашоого активдүү катышуу мүмкүнчүлүктөрүн берүү үчүн түзүлгөн. БУУнун Өнүктүрүү программасынын өкүлдөрү мындай демилгелер жаштардын экономикалык мүмкүнчүлүктөрүн кеңейтүүгө, ишкердикти өнүктүрүүгө жана региондордогу социалдык биримдикти бекемдөөгө жардам берерин белгилешти.