Бишкекте 50дөн ашык бала акысыз медициналык текшерүүдөн өттү

‹›

Бишкекте балдарды коргоо күнүнө арналган кайрымдуулук иш-чарасы уюштурулду. Кыргызстандагы профессионалдык союздар федерациясы, саламаттыкты сактоо кызматкерлеринин профсоюзу жана Бишкек шаардык билим берүү кызматкерлеринин профсоюзу биргеликте мобилдик клиника уюштуруп, профсоюз мүчөлөрүнүн балдарына медициналык жардам көрсөттү.

Иш-чара Бишкектеги №84 орто мектепте өтүп, ар кандай тармактардагы профсоюз мүчөлөрүнүн балдары катышты. Күн бою кичинекей катышуучулар акысыз медициналык текшерүүдөн өтүп, квалификациялуу адистерден кеңеш алышты. Балдар үчүн педиатр, ЛОР-доктор, стоматолог жана УЗИ текшерүүлөрү уюштурулду. 50дөн ашык бала комплекстүү профилактикалык текшерүүдөн өтүп, ден соолугун чыңдоо боюнча сунуштар алышты.

Кыргыз мамлекеттик медициналык академиясынын адистери иш-чараны өткөрүүгө чоң жардам көрсөтүп, балдарга профессионалдык кеңештер жана медициналык жардам беришти. Саламаттыкты сактоо кызматкерлеринин профсоюзунун төрагасы Каарманбек Байдавлетов, балдардын ден соолугу өлкөбүздүн келечеги үчүн негизги фактор экенин белгиледи. “Бул майрамдык күнү адистердин көңүл буруусун жана медициналык текшерүүдөн акысыз өтүү мүмкүнчүлүгүн берүү биз үчүн кубаныч”, – деди ал.

Федерациянын жаштар кеңешинин төрагасы Кайрат Тороев, ФПСКнын төрагасынын атынан балдарды майрамы менен куттуктады. “Ар бир бала ден соолукта, бактылуу жана камкордукта өссүн. Бүгүнкү иш-чара профсоюздардын Кыргызстандагы үй-бүлөлөрдү колдоого жана балдардын гармониялуу өнүгүшү үчүн жагымдуу шарттарды түзүүгө болгон көңүл буруусунун дагы бир далили”, – деп белгиледи ал.

Бул иш-чара профсоюздук уюмдардын, медициналык коомчулуктун жана билим берүү тармагынын эффективдүү кызматташтыгынын жаркын мисалы болуп, балдардын ден соолугу жана бакубаттуулугу үчүн биригишкенин көрсөттү.