Кыргызстан жана европалык компаниялар индустриалдык парк жана инвестициялык фонд түзүүнү пландаштырууда

‹›

Кыргызстандын экономика жана соода министрлигинде Бакыт Сыдыковдун жетекчилиги астында европалык компаниялардын өкүлдөрү менен жолугушуу болду. Жолугушууда «Edelweiss Group», «Piper Deutschland AG», «Swisscows AG», «BRUGG» жана «Mountain Wolf» компанияларынын өкүлдөрү катышты.

Тараптар инвестиция, өнөр жай жана технологиялык кызматташтыкты кеңейтүү, ошондой эле ири биргелешкен долбоорлорду ишке ашыруу маселелерин талкуулашты. Евразиялык индустриалдык-финансылык паркты түзүү жана Кыргыз-Швейцария инвестициялык фондун түзүү боюнча сунуштарга өзгөчө көңүл бурулду.

Жолугушуунун жыйынтыгында Кыргызстандын экономика жана соода министрлиги менен «Edelweiss Group» ортосунда эки багыт боюнча меморандумдарга кол коюлду: Евразиялык индустриалдык-финансылык паркты түзүү жана Кыргыз-Швейцария инвестициялык фондун түзүү.

Бул демилгелер чет элдик инвестицияларды тартууга, заманбап технологияларды киргизүүгө, өнөр жай секторун өнүктүрүүгө жана эл аралык экономикалык кызматташтыкты бекемдөөгө багытталган. Кыргызстан үчүн мындай кызматташтык жаңы мүмкүнчүлүктөрдү ачып, өлкөнүн экономикалык өсүшүнө салым кошот.