Кыргызстан Новосибирктен курулуш бизнесин тартууда

‹›

Кыргызстан жаңы курулуш бизнесин Новосибирск шаарынан тартууда. Улуттук инвестиция агенттигинин маалыматына ылайык, агенттиктин жетекчиси Равшанбек Сабиров Новосибирск облусунун мыйзам чыгаруу жыйынынын орун басары жана «Биринчи курулуш фонду» компаниялар тобунун башкы директору Майис Мамедов менен жолугушту.

Жолугушуунун жүрүшүндө тараптар турак жай жана инфраструктура курулушу боюнча кызматташуу мүмкүнчүлүктөрүн, курулуш материалдарын жергиликтүү өндүрүү маселелерин, ошондой эле биргелешкен бизнес-форум уюштуруу мүмкүнчүлүктөрүн талкуулашты.

Равшанбек Сабиров Кыргызстан бүгүнкү күндө чоң курулуш жана инфраструктура долбоорлорун ишке ашырууга катышууга даяр, ишенимдүү жана узак мөөнөттүү өнөктөштөрдү тартууга кызыкдар экенин белгиледи. Ал Новосибирск бизнес коомчулугу менен кызматташуу үчүн чоң мүмкүнчүлүктөр бар экенин жана инвесторлор үчүн ыңгайлуу шарттарды түзүүгө даяр экенин айтты.

Жолугушуунун алкагында орус тарапка Кыргызстандагы инвестициялык мыйзамдар, бизнес коргоо чаралары, «бирдиктүү терезе» механизми, ошондой эле инвесторлор үчүн каралган салык жана виза жеңилдиктери тууралуу маалымат берилди.

Жолугушуунун жыйынтыгында тараптар өнөктөштүктү чыңдоого кызыкдар экенин билдиришти жана биргелешкен инвестициялык жана курулуш демилгелерин иштеп чыгуу боюнча макулдашышты.