Кыргыз киносу Канндагы кино базарында көрсөтүлөт

‹›

Кыргызстандын киноиндустриясынын делегациясы 2026-жылдын 12-18-майында дүйнөдөгү эң ири кино базарында, Канн кинофестивалынын алкагында өтүүчү Marché du Film иш-чарасына катышат. Бул тууралуу Кыргызстандын Маданият министрлиги маалымдады.

Кино базарда Kyrgyz Cinema аттуу улуттук стенд уюштурулат, анда өлкөнүн кино өнөрүнүн өнүгүү мүмкүнчүлүктөрү жана эл аралык кызматташуу тууралуу маалыматтар көрсөтүлөт. Делегация Азия жана Европа өлкөлөрүнүн киноиндустриясынын өкүлдөрү менен, анын ичинде продюсерлер, дистрибьюторлор жана фестивалдардын программалык директорлору менен жолугушууларды өткөрөт. Негизги көңүл копродукцияны өнүктүрүүгө жана кыргыз фильмдеринин эл аралык таратуусун кеңейтүүгө бурулат.

Бул жылы катышуу өзгөчө мааниге ээ, анткени улуттук кино 85 жылдыгын белгилеп жатат жана Marché du Film программасында Азия багытына көбүрөөк көңүл бурулууда. Ошондой эле, сериалдык өндүрүштү өнүктүрүү жана «Кыргыз керемети» доорунун мурасын сактоо боюнча сүйлөшүүлөр пландалууда, бул санариптештирүү жана классикалык фильмдерди реставрациялоо маселелерин камтыйт.

«Кыргызфильм» кино базарында эки толук метраждуу көркөм фильмди көрсөтөт: «Кара Кызыл Сары» (режиссёрү Актан Арым Кубат) жана «Буйрук» (режиссёрү Дастан Мадалбеков).

Мындан тышкары, UmutDoc эл аралык документалдык кино фестивалы Cannes Docs программасына киргизилгени, дүйнөлүк кино индустриясынын алдыңкы өкүлдөрү менен кызматташууну кеңейтүү үчүн жаңы мүмкүнчүлүктөрдү ачат. Кыргыз делегациясынын катышуусу Кино өнөрү департаменти тарабынан уюштурулуп, улуттук киноиндустрияны эл аралык деңгээлде илгерилетүүгө багытталган.