Бишкекте республикалык «Мектеп лигасы» оюндары башталды

‹›

Бишкекте, Каба уулу Кожомкула атындагы спорт сарайында 4-майда «Мектеп лигасы» республикалык оюндардын ачылыш аземи өттү. Бул тууралуу Жаштар жана спорт агенттиги маалымдады. Иш-чарага агенттиктин директору Урмат Асанбаев, машыктыруучулар жана окуучулар катышты.

Урмат Асанбаев өз сөзүндө оюндардын башталышы менен катышуучуларды куттуктап, бул долбоордун жаштар арасында спортту өнүктүрүүгө чоң салым кошорун белгиледи. Ал спортчуларга ийгилик, адилеттүү атаандаштык жана жогорку натыйжаларга жетишүүнү каалады.

«Мектеп лигасы» республикалык оюндары мектеп окуучулары арасында өткөрүлүп, жаштардын спортко болгон кызыгуусун арттыруу, дене тарбияны жайылтуу жана алардын таланттарын өнүктүрүү максатын көздөйт. Финалдык оюндар 8-майга чейин уланат. Жеңүүчүлөр үчүн сыйлык фонду төмөнкүдөй: 1-орун — 500 000 сом, 2-орун — 300 000 сом, 3-орун — 200 000 сом.

Спорттун жаштар арасында популярдуулугун арттыруу, дене тарбия жана саламаттыкты сактоо боюнча билим берүү маанилүү. Мындай иш-чаралар жаштардын активдүүлүгүн жогорулатууга, командалык рухту бекемдөөгө жана спортко болгон кызыгуусун арттырууга жардам берет.