Бишкекте эл аралык «Чексиз симфония» концерти өттү

‹›

Бишкекте 29-30-апрелде Т. Сатылганов атындагы Кыргыз улуттук филармониясында «Чексиз симфония» аттуу эл аралык музыкалык концерт өттү. Бул иш-чарага биринчи айым Айгуль Жапарова, мамлекеттик катчы Арслан Койчиев, маданият, маалымат жана жаштар саясаты боюнча вице-министр Аскаралы Мадаминов, шаар мэри Айбек Джунушалиев, БУУнун Кыргызстандагы туруктуу координатору Антье Граве жана башка коноктор катышты.

Концерттин негизги максаты – элдерди, маданияттарды жана чыгармачылык дүйнөлөрдү музыка аркылуу бириктирүү. Концерттик программада Кыргыз улуттук филармониясынын эстрадно-симфониялык оркестри, белгилүү маданият ишмери, Өзбекстандын эл артисти, дирижер Нура Омурбаевдин жетекчилигинде, ошондой эле немис композитору, аранжировщик жана эл аралык музыкалык долбоорлордун жетекчиси Адриан Верумдун жетекчилигиндеги «ODK Orchestra» эл аралык коллективи чыгышты.

Эки оркестрдин бириктирилиши классикалык, этникалык жана заманбап музыканы жаңы симфониялык форматта сунуштады. Көрүүчүлөр кыргыз, европа, кытай, монгол, испан, немис, орус, түрк жана башка музыкалык маданияттардын чыгармаларын угушту. Кыргыз музыкасынын жаңы симфониялык аранжировкаларына өзгөчө көңүл бурулду, бул улуттук мурастын жаңы жактарын ачууга мүмкүндүк берди.

Мындай иш-чаралар эл аралык деңгээлде маданияттарды жакындаштырууга, музыкалык байланыштарды күчөтүүгө жана кыргыз маданиятын дүйнөгө таанытууга чоң салым кошот. Музыка – бул элдерди бириктирген универсалдуу тил, ал ар дайым адамдарды жакындаштырат.