Баткен районунда селдин кесепеттерин жоюу жана өзгөчө кырдаал режими киргизилди

‹›

Баткен районундагы Ак-Татыр жана Самаркандек айылдарында селдин кесепеттерин жоюу иштери уланууда. Бул тууралуу облустун өкүлчүлүгүнөн билдиришти. Баткен облусундагы президенттин ыйгарым укуктуу өкүлүнүн биринчи орун басары Бактыбек Токсонбаев жеринде жарандык коргонуу кызматтары менен чогулуп, сел суусунан турак жайларды тазалоо жана элге жардам көрсөтүү боюнча тапшырмаларды берди.

Ак-Татыр айылдык аймагындагы Орукзар, Керме-Тоо жана Уч-Добо айылдарында сел суулары 50 турак үйдүн короосун каптап, 10 үйдүн подвалдарына чейин кирип кеткен. Жалпысынан, жабыркаган айылдардан 149 адам (35 үй-бүлө) эвакуацияланып, туугандарынын үйүнө жайгаштырылды. Ошондой эле, Ак-Татыр айылындагы Т. Садыков атындагы орто мектепте убактылуу жайгаштыруу пункту уюштурулган.

Селдин кесепеттерин жоюу үчүн 134 жарандык коргонуу кызматкерлери жана жергиликтүү бийлик өкүлдөрү тартылып, 22 техника колдонулууда. Баткен районундагы кырдаалдын оордугун эске алып, өзгөчө кырдаалдар режими киргизилди.

Мындай кырдаалдарда жарандардын коопсуздугун камсыздоо, жардам көрсөтүү жана инфраструктураны калыбына келтирүү үчүн жергиликтүү бийлик жана жарандык коргонуу кызматтары тыгыз кызматташып, элге колдоо көрсөтүүдө. Селдин кесепеттерин жоюу иштери уланууда, жана бардык күч-аракеттер жабыркагандарга жардам берүүгө багытталган.