Бишкекте шаардыктын 148 жылдыгына арналган майрамдар өтүүдө

‹›

Бишкекте бүгүн, 29-апрелде, шаар күнүнө арналган майрамдык иш-чаралар башталды. Бул тууралуу шаардык мэриядан билдиришти. Иш-чаранын алкагында «Тунгуч» театрында Бишкектин 148 жылдыгына арналган салтанаттуу бөлүк өттү. Анда Бишкек шаарынын мэри Айбек Джунушалиев, Бишкек шаардык кенешинин төрагасы Бекжан Усеналиев, ардактуу жарандар, муниципалитеттин жетекчилери жана кызматкерлери катышты.

Шаар башчысы келген конокторду жана бардык шаардыктарды Бишкектин күнү менен куттуктады. Ал Бишкектин азыркы учурда туруктуу өнүгүп жатканын белгилеп, шаардагы өзгөрүүлөрдү, жаңы мектептер, бала бакчалар, спорттук жана маданий объектилердин курулушун, транспорт жана инфраструктуранын өнүгүшүн айтып өттү. Соңку жылдары шаарга инвестициялар тартылып, экология жана шаардык чөйрө боюнча маанилүү долбоорлор ишке ашырылып жатканын кошумчалады.

Мэр Бишкектин өнүгүүсү учурдагы тапшырмалардан тышкары, келечекке болгон так көрүү менен курулуп жатканын белгиледи. 2050-жылга чейин Бишкектин Генералдык планы бекитилген, бул документ шаарды узак мөөнөттүү келечекте кандай болорун аныктайт: ыңгайлуу, тең салмактуу, экологиялык жактан таза жана жашоого ыңгайлуу. Эң негизгиси, булардын бардыгы адамдар үчүн, Бишкекте жашоону, иштөөнү, окууну, балдарды тарбиялоону жана келечекти курууну жеңилдетүү үчүн жасалууда.

Бишкек — биздин жалпы үйүбүз. Ошондуктан, анын эртеңки күнү кандай болору ар бирибизге байланыштуу. Көчөлөрдүн тазалыгы, бири-бирибизге болгон урмат, шаарга болгон камкордук — бул биздин жашаган чөйрөбүздүн негизги принциптери. Алдыда дагы көп тапшырмалар жана жаңы долбоорлор бар. Бирок эң негизгиси, бизде Бишкек кандай болушу керектиги боюнча жалпы түшүнүк бар — ар бир адамга ыңгайлуу шаар.

Иш-чаранын алкагында сыйлыктар тапшырылды. Шаарды өнүктүрүүгө салым кошкон жарандар жана муниципалитеттин мыкты кызматкерлери Ардак грамоталары, кол сааттары, нагруддук белгилер жана «Бишкек шаарынын ардактуу жарандыгы» наамдары менен сыйланды. Мындан тышкары, майрамдык иш-чаранын катышуучулары Бишкек шаардык мэриясынын маданий башкармалыгынын чыгармачыл жамаатынын музыкалык чыгармаларын угушту.

Мэриядан билдиришкендей, күнү бою шаар аймактарында майрамдык иш-чаралар өтүүдө. Салтанаттын чокусун Ала-Тоо аянтында өтүүчү концерт жана «Вальс кечеси» фестивалы түзөт, ал 18:00дө башталат.