ШОС өлкөлөрү аскердик кызматташтыгын бекемдеди – Бишкектеги жолугушуунун жыйынтыгы

‹›

Бишкекте Шанхай Кызматташтык Уюмуна мүчө мамлекеттердин коргоо министрлеринин жыйыны өттү. Жыйын Ала-Арча мамлекеттик резиденциясында болуп, анда министрлер жана расмий делегациялардын мүчөлөрү Кыргызстандын президенти, Куралдуу Күчтөрдүн Башкы командири Садыр Жапаров менен жолугушту.

Жолугушуудан кийин коргоо министрлеринин жыйыны башталды. Жыйынды Кыргызстандын коргоо министри Руслан Мукамбетов жетектеп, ал жыйынды ачып жатып, бул жыйындын маанилүүлүгүн белгиледи. Ал Шанхай Кызматташтык Уюмунун 25 жылдыгына арналганын айтып, “25 жыл ШОС: бирге туруктуу дүйнөгө, өнүгүүгө жана гүлдөшкө” деген ураан менен өткөрүлүп жатканын билдирди.

Мукамбетов учурдагы шарттарда уюмдун регионалдык туруктуулукту камсыздоодогу ролун баса белгилеп, коргоо тармагындагы негизги приоритеттердин бири катары өз ара ишенимди бекемдөө жана ачыктыкты камсыздоону атады. Ал ачык диалог жана алдын ала болжолдоо аркылуу гана тынчтыкты сактап, элдердин коопсуздугун камсыздай алабыз деп ишенерин айтты.

Жыйындын соңунда Руслан Мукамбетов делегация башчыларына жемиштүү иштери үчүн ыраазычылык билдирип, Кыргызстандын коргоо министрлиги бардык мүчө мамлекеттердин коргоо органдары менен конструктивдүү жана өз ара пайдалуу кызматташууга дайым даяр экенин белгиледи. Ал, ошондой эле, өз ара ишеним жана коллективдик жоопкерчилик негизинде гана заманбап чакырыктарга каршы тура алабыз жана элдерибизге туруктуу тынчтык, бекем коопсуздук жана гүлдөшүүнү камсыздай алабыз деп кошумчалады.

Жыйындын жүрүшүндө бир катар келишимдерге кол коюлду.