Нарындык мугалим: Айлык акы 50–55 миң сом болот деп күтөм

‹›

Кыргызстанда 1-апрелден тартып билим берүү мекемелериндеги эмгек акы 100%га жогорулайт. Бул тууралуу Билим берүү министрлиги маалымдады. Жаңы эмгек акы мугалимдердин банк карталарына кийинки күндөн баштап түшө баштайт.

Нарын шаарындагы Эсенгул Ибраев атындагы инновациялык мектептин башталгыч класстарынын мугалими Гулиза Дайырбек кызы бул өзгөрүү тууралуу өз оюн билдирди. Ал билим берүү тармагында төрт жылдан бери иштеп келет жана аптасына 16 саат сабак берет. Алгачкы жылдарында анын эмгек акысы 21 миң сомду түзсө, быйыл декреттик отпусктан кийин 26 миң сом алууда. Эми ал эмгек акысын 50-55 миң сомго чейин жогорулайт деп күтүп жатат.

Гулиза Дайырбек кызы мурдагы эмгек акысы күнүмдүк жашоосуна жетпей турганын белгиледи. “Мурда менин эмгек акыма жетпей калчу, анткени көп акча күнүмдүк муктаждыктарга, өзүмдүн жана кызымдын муктаждыктарына, ошондой эле окуу материалдарына кетчү. Азыр жогорулатылган эмгек акы жетиштүү болот деп үмүттөнөм”, – деди ал.

1-апрелден тартып мугалимдердин эмгек акысы эки эсе жогорулаган. Бул чечим президент Садыр Жапаровдун 26-марттагы жарлыгынын негизинде кабыл алынган. Жогорулатылган эмгек акысын алчу кызматкерлердин саны төмөнкүдөй бөлүнгөн:

– Бала бакча – 30 960 адам
– Мектеп – 128 437 адам
– Башталгыч кесиптик билим берүү – 8 563 адам
– Мектептен тышкаркы билим берүү – 2 143 адам
– Орто кесиптик билим берүү – 8 120 адам
– Окуу-методикалык кабинеттер – 407 адам
– Педагогдордун квалификациясын жогорулатуу институттары жана Кыргыз билим берүү академиясы – 401 адам

Жалпы 183 978 адам жаңы эмгек акы менен камсыз болот. Жаңы эмгек акы 7040 сомдук базалык ставкадан эсептелип, тиешелүү коэффициенттер колдонулат. Ошондой эле, эмгек акыга президенттик компенсация 15 миң сом кошулат. Техникалык жана жашы жете элек кызматкерлер үчүн компенсация 5 миң сомду түзөт.

Эмгек акылары төмөнкүдөй өзгөрдү (жогорулатууга чейин жана кийин):

– Мектеп мугалими – 26 800 сомдон 50 972 сомго (18 саат)
– Бала бакча тарбиячысы – 26 976 сомдон 55 723 сомго (36 саат)
– Методист – 15 210 сомдон 53 438 сомго (40 саат)
– Кружок жетекчиси – 27 076 сомдон 49 872 сомго (20 саат)
– Иш өндүрүшүн үйрөтүүчү – 28 966 сомдон 57 128 сомго (40 саат)

Ошондой эле жетекчилердин эмгек акылары да жогорулады:

– Мектеп директору – 22 472 сомдон 55 255 сомго
– Бала бакча жетекчиси – 18 676 сомдон 52 447 сомго
– Методикалык кабинет жетекчиси – 18 676 сомдон 55 255 сомго
– Мектептен тышкаркы билим берүү уюмунун жетекчиси – 17 011 сомдон 49 022 сомго
– Кесиптик лицейдин директору – 25 692 сомдон 56 107 сомго

Билим берүү тармагына республикалык бюджеттен 58 миллиард сом бөлүнгөн. Эмгек акыларды жогорулатуу үчүн кошумча бюджет 9 айга 41,3 миллиард сомду түзөт. 2027-жылы дагы 55,1 миллиард сом талап кылынат.