Сергей Вакунов: Кыргызстан менен Россиянын мамилесинде негизги нерсе – өз ара сыйлашуу жана колдоо

‹›

Кыргызстан менен Россиянын ортосундагы кызматташтык өз ара пайдалуулукка гана эмес, ошондой эле бири-бирине жардам берүү, тарыхый жакындык жана жалпы максатка негизделген. Бул тууралуу Россиянын Кыргызстандагы элчиси Сергей Вакунов Биринчи радиодо билдирди.

Ал кызматташтыктын негизги мааниси өз ара урматтоо жана пайдалуулук экенин белгиледи. “Биздин кызматташтыктын эң негизги мааниси — бул өз ара урматтоо жана пайдалуулук. Кыргызстанда жана Россия Федерациясында мамлекет башчыларынын койгон максаты бирдей — калктын жашоо деңгээлин жакшыртуу жана жарандардын коопсуздугун камсыздоо. Коопсуздук болбосо, экономика өнүгө албайт, ал эми экономика өнүкпөсө, жашоо деңгээли көтөрүлбөйт”, — деди ал.

Вакунов, ошондой эле, өлкөлөрдүн ортосундагы мамилелер пайда табуу максатында гана эмес, бири-бирине жардам берүү принциптерине негизделгенин айтты. “Эгер дипломатиялык тилде сүйлөбөсөк, биздин мамилелер пайда алуу максатында гана эмес. Биз бири-бирибизге жардам берүүгө дайым даярбыз. Мисалы, COVID-19 пандемиясы учурунда Россия Кыргызстанга вакциналарды жөнөтүп, жарандардын ден соолугун коргоду. Дарыгерлер келип, жаңы протоколдорду киргизишти”, — деди ал.

Ал ошондой эле, кыргызстандыктар кыйынчылык учурунда Россияга гуманитардык жардам жиберип, өз ара жардамдашуу мүнөзүн көрсөтүшкөнүн белгиледи. “Биздин мамилелерде өз ара пайдалуулук жана биргелешкен долбоорлор маанилүү”, — деп кошумчалады ал.

Тарыхый негиз да мамилелерде маанилүү роль ойнойт. “Биздин тарыхыбызда, байыркы, советтик жана азыркы мезгилде, элдерибиздин ачык жана боорукер экендиги көрүнүп турат. Мисалы, Улуу Ата Мекендик согуш учурунда Кыргызстан Ленинграддан келген көптөгөн качкындарды кабыл алган. Алар жаңы үй-бүлөлөрдү, ата-энелерди таап, жашоого мүмкүнчүлүк алышкан”, — деди Вакунов.

Ал ошондой эле, бүгүнкү күндө да бул негиздин сакталуусун белгиледи. “Эгер Кыргызстанга жардам керек болсо, биз дайым жардам берүүгө даярбыз. Бул 2021 жана 2022 жылдары да болгон”, — деди ал.

Вакунов практикалык өз ара аракеттенүүнүн мисалдарын да келтирди. “Кыргызстанда табигый кырсыктар боюнча кыйынчылыктар бар экенин түшүнөбүз. Республика өрт өчүрүүчү унаалар жана вертолет сураганда, Россия жардам берди. 40 өрт өчүрүүчү унаа жана бир вертолет сатып алуу үчүн уникалдуу грант бөлүндү. Бул техника Кыргызстандагы инфраструктуранын өзгөчөлүктөрүнө ылайыкташтырылган”, — деди ал.

Дипломат мындай мисалдардын көп экенин белгилеп, мамилелердин пайда алуу үчүн гана эмес, жакындык үчүн курулганын айтты. “Бул бизнес өнүгүүсүнө жана адамдардын бакубаттуулугуна, тынч иштөө, турак жайга ээ болуу, жакшы киреше табуу жана келечекке пландарды түзүү мүмкүнчүлүгүнө таасир этет”, — деп жыйынтыктады ал.