Таалайбек Ибраев энергетиктердин ШОС жана ВИК саммитине даярдыгын текшерди

‹›

Энергетика министр Таалайбек Ибраев Бишкектеги электр тармактары ишканасынын иши менен таанышып чыкты. Министр складдарды карап чыгып, авариялык кырдаалдарды тез арада жоюу үчүн зарыл болгон материалдар жана жабдуулар менен камсыздалышын текшерди. Ошондой эле, ал жабдуулардын сакталуу шарттарын да карады.

Ишкананын жетекчиси Ильгиз Сыдыгалиев жабдуулардын жетиштүү экенин айтып, жакынкы мезгилде өтө турган жылуулук сезонуна даярдык көрүү иштери башталганын маалымдады. Министр ошондой эле борборлоштурулган автоматташтырылган эсептөө системасынын улуттук операциялык борборун зыярат кылып, электр энергиясын эсепке алуу жана башкаруу боюнча заманбап чечимдер менен таанышып чыкты.

Ибраев мырза ишкананын атайын техникаларын жана өндүрүш инфраструктурасын да карап чыкты. Ал курулуш-монтаждоо бөлүмүнүн (КМБ) ишин күчөтүүнү тапшырды. Бул бөлүм көп функционалдуу шаардык комплекс куруу долбоорун ишке ашырууда, анын ичинде жаңы Ош базары жана жаңы автовокзалдын аймагында 90 км узундуктагы өзүн-өзү колдогон изоляцияланган зым (СИП-3) тартуу боюнча иш алып барууда.

Министр электр энергиясын камсыздоонун ишенимдүүлүгүн жогорулатуу маанилүү экенин белгилеп, Шанхай кызматташтык уюму жана Дүйнөлүк көчмөндөр оюндарынын алкагында өткөрүлүүчү иш-чараларга сапаттуу даярдык көрүүнү жана үзгүлтүксүз электр энергиясын камсыздоону камсыз кылууну тапшырды. Ошондой эле, 2026-2027-жылдарга жылуулук сезонуна даярдыкты күчөтүү боюнча конкреттүү тапшырмаларды берди.