Саламаттык сактоо министрлиги жана АКШнын элчиси санариптештирүү жана медициналык технологиялар боюнча маселелерди талкуулашты

‹›

Бишкекте 7-апрелде Кыргызстандын Саламаттык сактоо министрлиги менен Америка Кошмо Штаттарынын Кыргызстандагы элчиси Лесли Вигери ортосунда жолугушуу болду. Жолугушууда тараптар кыргыз-американ кызматташтыгынын учурдагы абалы жана келечеги тууралуу пикир алышты.

Америкалык тараптын Кыргызстандын саламаттык сактоо системасын өнүктүрүүгө кошкон салымы чоң экендиги белгиленди. Алар инфекциялык оорулардын жайылышына каршы күрөшүү, коомдук саламаттыкты сактоо программаларын өнүктүрүү жана саламаттык сактоо системасын бекемдөө боюнча иштерди жүргүзүүдө активдүү роль ойноп келишет.

Жолугушуунун алкагында, америкалык тарап кызматташтыкты өнүктүрүүнүн жаңы жолдорун сунуштады. Проекттердин улантылышын камсыз кылуу жана алардын келечектеги өнүгүшү боюнча биргелешкен стратегияларды иштеп чыгууга көңүл бурулду.

Ошондой эле, медициналык технологиялар, фармацевтика жана инфраструктуралык чечимдер боюнча эл аралык жана жеке компаниялар менен кызматташтыкты кеңейтүү мүмкүнчүлүктөрү талкууланды. Жолугушуунун жыйынтыгы боюнча конструктивдүү диалогду улантуу жана Кыргызстандын саламаттык сактоо системасын бекемдөөгө багытталган кызматташтыкты өнүктүрүү боюнча өз ара кызыгууларын билдиришти.

Саламаттык сактоо тармагындагы кызматташтык, өлкөнүн жалпы өнүгүүсүнө чоң салым кошо алат, андыктан мындай жолугушуулар маанилүү.