Кыргызстан менен Индия коргонуу министрликтеринин жолугушуусунун жыйынтыгы боюнча протоколго кол коюшту

‹›

Нью-Дели шаарында 6-апрелде Кыргызстандын жана Индиянын аскердик кызматташтыгы боюнча биргелешкен жумушчу топтун төртүнчү жыйыны өттү. Бул тууралуу Кыргызстандын Коргоо министрлиги маалымдады. Кыргыз делегациясын министрликтин эл аралык аскердик кызматташтык башкармалыгынын башчысы Рустам Ормокоев жетектесе, Индия тараптан эл аралык кызматташтык боюнча бириккен катчы Амит Теланг катышты.

Жыйындын жүрүшүндө тараптар аскердик жана аскердик-техникалык кызматташтык боюнча актуалдуу маселелерди талкуулашты. 2026-2027-жылдарга пландалган иш-чаралар жана жакынкы келечектеги кызматташтыкты өнүктүрүү боюнча сүйлөшүүлөр болду. Жыйындын жыйынтыгы катары протоколго кол коюлду.

Ошондой эле, жыйын учурунда Индиянын Коргоо министрлигинин эл аралык кызматташтык боюнча генеральдык директору Акааш Джохар менен эки тараптуу жолугушуу болуп, аскердик жана аскердик-техникалык кызматташтык боюнча пикир алмашылды.

Аскердик кызматташтык өлкөлөр ортосундагы коопсуздукту камсыз кылуу жана өз ара түшүнүшүүнү бекемдөө үчүн маанилүү. Мындай жыйындар эки өлкөнүн аскердик күчтөрүнүн өз ара аракеттенүүсүн жакшыртууга, жаңы технологияларды жана тажрыйбаларды алмашууга мүмкүндүк берет.