Бишкекте куткаруучуларды жана өрт өчүрүүчүлөрдү даярдоону күчөтөт

‹›

Министр өзгөчө кырдаалдар боюнча Канатбек Чыныбаев 6-апрелде Эл аралык жарандык коргонуу уюмунун (ЭЖКУ) башкы катчысы Аргуджа Калантарли баштаган делегацияны кабыл алды. Жолугушууда тараптар кызматташтыктын туруктуу жана конструктивдүү мүнөзүн белгилешти. Бул кызматташтык ачыктык, өз ара урматтоо жана ишеним принциптерине негизделген.

Кызматташтыктын негизги максаты өзгөчө кырдаалдарды алдын алуу, кырсыктардан келип чыккан коркунучтарды азайтуу жана калкты, аймактарды коргоо болуп саналат. Башкы катчы Кыргызстандын ЭЖКУдагы ролун жогору баалап, анын маанилүүлүгүн белгиледи. Өз кезегинде министр кызматташтыктын приоритеттүү жана келечектеги багыттарын белгиледи.

Ошондой эле, Бишкекте жайгашкан ЭЖКУнун регионалдык кеңсесинин ишмердүүлүгүнүн приоритеттери жана өлкөдө пилоттук долбоорлорду ишке киргизүү маселелери талкууланды. Негизги багыттардын катарында окутуу жана машыгуу инфраструктурасын өнүктүрүү, атайын полигондорду түзүү жана жабдуу, куткаруучулар, өрт өчүрүүчүлөр жана сууда сүзүүчүлөрдүн квалификациясын жогорулатуу, бөлүмдөрдү заманбап жабдуулар менен камсыздоо, ошондой эле регионалдык деңгээлде өзгөчө кырдаалдарга жооп берүү механизмдерин жакшыртуу белгиленди.

Визиттин алкагында башкы катчы кризис учурларын башкаруу борборунун иши, жооп берүү системасынын принциптери жана колдонулган техникалык каражаттар менен таанышып, куткаруучуларды даярдоо борборун да зыярат кылды. Бул жерде заманбап өрт өчүрүү жана авариялык-куткаруу унаалары, атайын техника жана издөө-куткаруу иштеринин жүрүшү көрсөтүлдү.